డీఎంకే వ్యతిరేక కూటమికి కొత్త అడ్రస్ టీవీకే

• తమిళనాడు రాజకీయాల్లో పెను మార్పు

• మొదటిసారిగా అధికారం కోల్పోయిన ద్రవిడ పార్టీలు

• రిజర్వ్‌డ్ స్థానాలు, అర్బన్ ప్రాంతాల్లో విజయ్ పార్టీకి భారీ ఓట్‌షేర్

తమిళనాడులో ఏయే పార్టీలు తలపడ్డాయనే అంశాన్ని విశ్లేషిస్తే ఒక స్పష్టమైన ధోరణి కనిపిస్తోంది. సంప్రదాయకంగా డీఎంకే, అన్నా డీఎంకే నేరుగా తలపడిన 135 స్థానాల్లో ఎన్డీయే కూటమికి 52, టీవీకే 51, డీఎంకే కూటమి (ఎస్‌పీఏ) 25 సీట్లు వచ్చినట్లు అర్థమవుతుంది. ఇంకా తుదిఫలితాలు రావాలి. కాకపోతే తన మొదటి ఎన్నికల బరిలోనే, ద్రవిడ పార్టీల కంచుకోటల్లో టీవీకే (విజయ్ పార్టీ) అన్నా డీఎంకేతో సమానంగా పోరాడి సత్తా చాటింది. ముఖ్యంగా, డీఎంకేకు వ్యతిరేకంగా బీజేపీ ప్రధాన పోటీదారుగా ఉన్న 25 నియోజకవర్గాల్లో.. టీవీకే 16 చోట్ల ఆధిక్యం ఉండటం చూస్తే డీఎంకేకు వ్యతిరేకంగా ఈఐడీఎంకె కూటమో, లేదూ బీజేపీ పొత్తులో ఉన్న మరో కూటమో ప్రత్యామ్నాయం కాదని తేలింది. ఎందుకంటే.. పొత్తులో భాగంగా బీజేపీ పోటీ చేసిన ఒక్క సీటులో కూడా ఆధిక్యంలో లేదు. ఎక్కడైతే అన్నా డీఎంకే కంటే బీజేపీని ప్రధాన ప్రతిపక్షంగా భావించారో, అక్కడ ఆ స్థానాన్ని టీవీకే పూర్తిగా ఆక్రమించేసింది. చివరకు రిజర్వ్‌డ్ సీట్లలో (ఎస్సీ, ఎస్టీ, మహిళలు) టీవీకే సాధించిన 33% ఓట్ల వాటా చూస్తుంటే, ఆ పార్టీకి అన్ని సామాజిక వర్గాల మద్దతు లభించినట్లు అర్థమవుతుంది.

గ్రామీణ ప్రాంతాల కంటే పట్టణాల్లో, ముఖ్యంగా గ్రేటర్ చెన్నైలో టీవీకే సునామీ సృష్టించింది. అధికార పార్టీకి కంచుకోటలుగా ఉన్న ప్రాంతాల్లో డీఎంకేను కోలుకోలేని దెబ్బ తీయడమే కాకుండా, బీజేపీని వెనక్కి నెట్టి డీఎంకే వ్యతిరేక శక్తిగా విజయ్ పార్టీ అవతరించింది. అన్నా డీఎంకే తన కూటమి బలంతో పశ్చిమ, ఉత్తర ప్రాంతాల్లో పట్టు నిలుపుకోగా, డీఎంకే తన డెల్టా ప్రాంతంలో ఓటుబ్యాంకును కాపాడుకున్నా సీట్లను మాత్రం గెలుచుకోలేకపోయింది. తుది ఫలితాలు వచ్చేసరికి కేవలం మూడోవంతు ఓట్ల వాటాతోనే విజయ్ పార్టీ మెజారిటీ సాధిస్తే గనుక.. 1967 నుండి ద్రవిడ పార్టీల గుత్తాధిపత్యంలో ఉన్న తమిళనాడు రాజకీయ చరిత్రలో ఇది ఒక నూతన అధ్యాయం అవుతుంది.

తమిళనాడు రాజకీయాల్లో స్పష్టమైన పెనుమార్పు కనిపిస్తోంది. నటుడు జోసెఫ్ సి. విజయ్ నేతృత్వంలోని కొత్త పార్టీ తమిళగ వెట్రి కజగం (టీవీకే), 2026 అసెంబ్లీ ఎన్నికల్లో అతిపెద్ద పార్టీగా అవతరించింది. మొత్తం 234 నియోజకవర్గాలకు గానూ 101 స్థానాల్లో టీవీకే ముందంజలో ఉంది. మెజారిటీ మార్కు అయిన 118కి చేరువలో నిలిచింది.

ద్రవిడ ద్వైపాక్షిక రాజకీయాలకు బ్రేక్

దశాబ్దాలుగా సాగుతున్న డీఎంకే, అన్నా డీఎంకేల ద్వైపాక్షిక రాజకీయాలను విజయ్ టీవీకే దెబ్బతీసింది. అధికార డీఎంకే నేతృత్వంలోని సెక్యులర్ ప్రోగ్రెసివ్ అలయన్స్ (ఎస్‌పీఏ) మూడవ స్థానానికి పడిపోయింది. మరోవైపు, బీజేపీ, పి.ఎం.కె.లతో కూడిన అన్నా డీఎంకే కూటమి రెండో స్థానంలో ఉంది.

ఓట్ల శాతం విషయంలో మూడు కూటముల మధ్య గట్టి పోటీ ఉన్నప్పటికీ, సీట్ల సంఖ్యలో భారీ వ్యత్యాసం కనిపిస్తోంది. ముఖ్యంగా డీఎంకే కూటమి (ఎస్‌పీఏ) 2021తో పోలిస్తే 14.5 శాతం ఓట్లను కోల్పోవడమే కాకుండా, ఏకంగా 112 సీట్లలో వెనుకబడింది. ఈ ముక్కోణపు పోటీలో కొత్తగా వచ్చిన టీవీకే, అధికార కూటమి ఓటు బ్యాంకును భారీగా చీల్చడమే దీనికి ప్రధాన కారణం.

గ్రేటర్ చెన్నైలో క్లీన్ స్వీప్

టీవీకే ప్రభంజనం రాష్ట్రవ్యాప్తంగా ఉన్నప్పటికీ, ఉత్తర తమిళనాడులో ముఖ్యంగా ‘గ్రేటర్ చెన్నై’ ప్రాంతంలో స్పష్టంగా కనిపించింది. చెన్నై నగరం, దాని శివారు ప్రాంతాల్లోని 34 స్థానాలకు గానూ టీవీకే ఏకంగా 32 స్థానాల్లో ముందంజలో ఉంది. ఈ ప్రాంతంలో టీవీకే 45.4% ఓట్ల వాటాను దక్కించుకోగా, డీఎంకే కూటమి 29.6%, అన్నా డీఎంకే కూటమి 20.2% ఓట్లను సాధించాయి.

కుప్పకూలిన డీఎంకే కోటలు

ఓట్ల శాతం కంటే సీట్ల సంఖ్య పడిపోవడం ఇక్కడ ఆశ్చర్యకరంగా ఉంది. 2021లో ఈ ప్రాంతంలో 36 సీట్లు గెలుచుకున్న డీఎంకే కూటమి (ఎస్‌పీఏ), ఇప్పుడు సున్నాకి పరిమితమైంది.

`