అందుకే సచిన్..క్రికెట్ దేవుడయ్యాడు!

భారత క్రికెట్ దిగ్గజాల జాబితాలో సంజూ శామ్సన్ కూడా మొన్నటి టీ20 వరల్డ్‌కప్ ఫైనల్స్ నుంచి చేరారు. సచిన్ టెండూల్కర్ వంటి వ్యక్తి నుంచి తను పొందిన అమూల్యమైన సలహాలు తనకు ఎలా ఉపయోగపడ్డాయో ఈ సందర్భంగా ఆయన గుర్తుచేసుకున్నారు. తాను ఇబ్బందుల్లో ఉన్న సమయంలో టెండూల్కర్‌ను సంప్రదించినట్లు తెలిపారు. ‘అక్టోబర్‌లో ఆస్ట్రేలియాలో జరిగిన టీ20 సిరీస్ సమయంలో నేను జట్టులో ఉండి కూడా మ్యాచ్‌లు ఆడలేకపోతున్నప్పుడు.. అసలు ఎలాంటి మైండ్‌సెట్ అవసరమో అని ఆలోచించాను’ అని శామ్సన్ చెప్పారు.

గత రెండు నెలలుగా క్రికెట్ దిగ్గజం సచిన్‌తో తాను జరిపిన సంభాషణలు, త్వరలోనే మంచి రోజులు వస్తాయనే భరోసాను ఇచ్చాయని శామ్సన్ పేర్కొన్నారు. ‘నేను సార్‌ను సంప్రదించాను, ఆయనతో సుదీర్ఘంగా మాట్లాడాను. చివరికి నిన్న రాత్రి (టీ20 ప్రపంచ కప్ ఫైనల్స్‌కు ముందు రాత్రి) కూడా నేను ఎలా ఉన్నానో తెలుసుకోవడానికి ఆయన నాకు ఫోన్ చేశారు,’ అని ‘ప్లేయర్ ఆఫ్ ది టోర్నమెంట’ అవార్డు అందుకున్న తర్వాత శామ్సన్ వెల్లడించారు.

తన అద్భుతమైన బ్యాటింగ్ నైపుణ్యంతో ‘మాస్టర్ బ్లాస్టర’గా పేరుగాంచిన టెండూల్కర్‌ను, మరో దిగ్గజం సునీల్ గవాస్కర్ ‘బ్యాటింగ్ విశ్వవిద్యాలయం’ (యూనివర్సిటీ ఆఫ్ బ్యాటింగ్) అని అభివర్ణించారు. భారత మాజీ కోచ్ గ్యారీ కిర్‌స్టన్ కూడా గతంలో ఇదే పదాన్ని ఉపయోగించారు. భారత్ తరఫున ఆడటం ఆపేసి దాదాపు 13 ఏళ్లు అవుతున్నా, వివిధ స్థాయిలలో భారతీయ క్రికెటర్లకు నిశ్శబ్దంగా మార్గనిర్దేశం చేస్తున్న టెండూల్కర్‌కు ఈ బిరుదు నిజంగా తగినదే.

అంతర్జాతీయ క్రికెట్‌కు దూరమై దశాబ్ద కాలం గడిచినప్పటికీ, టెండూల్కర్ ఇప్పటికీ ఆటను నిశితంగా గమనిస్తూ, బ్యాటర్ల టెక్నిక్‌పై పదునైన విశ్లేషణలు చేస్తుంటారని పేరుంది. ఈ దిగ్గజ బ్యాటర్ తన పరిశీలనలను బహిరంగంగా వెల్లడించరు, కానీ ఏ ఆటగాడైనా సహాయం కోసం ఆయన్ని సంప్రదిస్తే, మద్దతు ఇవ్వడానికి ఎల్లప్పుడూ సిద్ధంగా ఉంటారు.

భారతదేశం 2011 ప్రపంచ కప్ గెలిచిన సందర్భాన్ని ఒక్కసారి గుర్తుకు తెచ్చుకోండి. ఆ టోర్నమెంట్‌కు ఏడాది ముందు యువరాజ్ సింగ్ బ్యాటింగ్‌లో అత్యంత గడ్డుకాలాన్ని ఎదుర్కొన్నారు. కనీసం ఆయన్ని జట్టులోకి తీసుకోవాలా వద్దా అనే ప్రశ్నలు తలెత్తాయి. శిక్షణా శిబిరం (క్యాంప్) సమయంలో యువరాజ్ అటు ఫామ్, ఇటు ఫిట్‌నెస్‌తో పోరాడుతున్నప్పుడు, టెండూల్కర్ ఆయనతో ఇలా అన్నారు.. ‘అత్యంత కీలకమైన సమయంలో నీ అవసరం కచ్చితంగా ఉంటుంది.’ ఆ తర్వాత యువరాజ్ ఆ టోర్నమెంట్‌లో ‘ప్లేయర్ ఆఫ్ ది టోర్నమెంట’గా నిలిచారు.

2014లో విరాట్ కోహ్లీ తన మొదటి ఇంగ్లాండ్ పర్యటనలో 10 ఇన్నింగ్స్‌ల్లో కేవలం 134 పరుగులు మాత్రమే చేసి మానసికంగా కుంగిపోయారు. తిరిగి వచ్చిన తర్వాత కోహ్లీ టెండూల్కర్‌కు ఫోన్ చేశారు. ఆ సమయంలో వారి మధ్య జరిగిన సంభాషణలు కేవలం టెక్నికల్ మార్పులు లేదా బ్యాటింగ్‌కు సంబంధించినవి మాత్రమే కావని కోహ్లీ తెలిపారు.

2025 ఇంగ్లాండ్ పర్యటనకు ముందు, కొత్తగా టెస్ట్ కెప్టెన్‌గా బాధ్యతలు చేపట్టిన శుభ్‌మన్ గిల్, ఇంగ్లీష్ పరిస్థితుల్లో ఎలా రాణించాలనే దానిపై తాను టెండూల్కర్ సలహా కోరినట్లు అంగీకరించారు. ప్రపంచవ్యాప్తంగా ఆడిన అనుభవం ఉన్న టెండూల్కర్, వివిధ దేశాల్లోని పిచ్‌లు, వాతావరణ పరిస్థితులకు ఎలా అలవాటు పడాలో తెలిపే ఒక ‘జ్ఞాన విజ్ఞాన సర్వస్వం’ వంటివారు.

‘మాస్టర’లోని గొప్పతనం ఏమిటంటే, ఆయనకు అక్కడి పరిస్థితులపై పూర్తి అవగాహన ఉంటుంది. ఎదుటి వ్యక్తికి ఆ పరిస్థితులను ఎలా అర్థం చేసుకోవాలో, వాటిని ఎలా గౌరవించాలో, వారికి ఏది సరిపోతుందో ఆయన స్పష్టంగా వివరిస్తారని టెండూల్కర్ స్నేహితుడు, ప్రస్తుతం ముంబై జట్టు ఫీల్డింగ్ కోచ్‌గా ఉన్న అతుల్ రణదే చెప్పారు.

నేటి తరం క్రికెటర్లకు సంప్రదించడానికి చాలామంది కోచ్‌లు ఉన్నప్పటికీ, వారు ఇంకా సచిన్ సలహాల కోసమే ఎందుకు వెళ్తుంటారు? దీనికి రణదే వివరిస్తూ.. “ఆయన అందించే సలహాల్లో నిజాయితీ ఉంటుంది. అలాగే ఆయన విషయాన్ని ఎంత సరళంగా వీలైతే అంత సరళంగా చెబుతారు, ఇది అవతలి వ్యక్తికి సులభంగా అర్థమయ్యేలా చేస్తుంది,” అని అన్నారు.

అవసరమైనప్పుడు భరోసా

కేవలం అంతర్జాతీయ క్రికెటర్లే కాకుండా, దేశవాళీ క్రికెటర్లు కూడా టెండూల్కర్ సలహాల ద్వారా ప్రయోజనం పొందుతున్నారు. ముఖ్యంగా ఆయన ఒకప్పుడు ఆడిన ముంబై జట్టుకు ఇది బాగా వర్తిస్తుంది. “ఇటీవల ఆయన డ్రెస్సింగ్ రూమ్‌కు వచ్చినప్పుడు, దాదాపు 90 నిమిషాల పాటు సర్ఫరాజ్ ఖాన్, యశస్వి జైస్వాల్‌తో సహా పూర్తి జట్టుతో గడిపారు,” అని రణదే తెలిపారు. ముంబై క్రికెటర్ పృథ్వీ షా విషయంలో అయితే, ముంబై క్రికెట్ అసోసియేషన్ గ్రౌండ్‌లో ప్రాక్టీస్ చేస్తున్నప్పుడు ఆయన కేవలం సాంకేతిక మెళకువలు (టెక్నికల్ టిప్స్) ఇవ్వడమే కాకుండా, తన ప్రవర్తనను మార్చుకుని ఆటపై పూర్తి దృష్టి పెట్టాలని కూడా హితవు పలికారు.

2018 ఆరంభంలో న్యూజిలాండ్‌లో జరిగిన ప్రపంచ కప్‌ను గెలుచుకున్న భారత అండర్-19 జట్టు కెప్టెన్‌తో టెండూల్కర్, “వాపస్ ట్రాక్ పే ఆజా” (తిరిగి గాడిలో పడు) అని చెప్పినట్లు సమాచారం. “ఆయన ఎప్పుడూ వారికోసం అందుబాటులో ఉంటారు, క్రీడకు తిరిగి తనవంతు సహకారం అందించడానికి ఎల్లప్పుడూ సమయం వెచ్చిస్తారు. తనకు సాధ్యమైన ఏ రూపంలోనైనా సహాయం చేయడానికి ఆయన సిద్ధంగా ఉంటారు,” అని రణదే పేర్కొన్నారు. యువ ఆటగాళ్లతో సంభాషించడానికి ఈ క్రికెట్ దిగ్గజం చూపే ఆసక్తిని, క్రీడపై ఆయనకున్న అంకితభావమే కారణమని ఆయన విశ్లేషించారు.

టెండూల్కర్ వారికోసం ఎల్లప్పుడూ సమయాన్ని కేటాయిస్తారు. 2014లో, టెండూల్కర్ రిటైర్మెంట్ అయిన కొన్ని నెలల తర్వాత వారు బ్యాడ్మింటన్ ఆడుతున్న సమయాన్ని రణదే గుర్తు చేసుకున్నారు. అప్పుడే రోహిత్ శర్మ వన్డేల్లో ఇండియా తరఫున ఓపెనర్‌గా రాణించడం మొదలుపెట్టారు. 2011లో డెక్కన్ ఛార్జర్స్ నుంచి రోహిత్ శర్మను ముంబై ఇండియన్స్‌కు తీసుకురావడంలో కూడా టెండూల్కర్ కీలక పాత్ర పోషించారని రణదే తెలిపారు. ఆ తర్వాతే రోహిత్ కెప్టెన్‌గా ఆ జట్టుకు ఐదు ఐపీఎల్ విజయాలను అందించారు.

“టెండూల్కర్ కేవలం క్రికెటర్ల టెక్నిక్ లేదా మైండ్‌సెట్‌లోనే కాకుండా, వారి జీవితాలను మార్చే కీలక నిర్ణయాల్లో కూడా సహాయపడ్డారు,” అని రణదే చెప్పారు. అయితే, శామ్సన్ విషయంలో లాగే, టెండూల్కర్ పాత్రను వెల్లడించాలా వద్దా అనేది ఆ సలహా పొందిన ఆటగాడికే వదిలివేస్తారు. “ఆటగాడు అభివృద్ధి చెంది, దేశం గర్వించేలా చేసినందుకు ఆయన సంతోషిస్తారు. ఒకవేళ ఆ ఆటగాడు దేశానికి కీర్తి ప్రతిష్టలు తెచ్చిపెడితే, సచిన్ అంతకు మించి మరేమీ ఆశించరు,” అని రణదే ముగించారు.

- గౌరవ్ గుప్తా, టైమ్స్ ఆఫ్ ఇండియా కోసం..