అఖండ 2’ హిందీలో ఎందుకు డిజాస్టర్‌?

భారీ అంచనాలతో మొదలైన ‘అఖండ`2’ ప్రయాణం ఎందుకు అనుకున్న దిశలో సాగలేకపోయిందన్న ప్రశ్న ఇప్పుడు ట్రేడ్‌ వర్గాల్లో కీలకంగా మారింది. మొదటి భాగం ఇచ్చిన ఘన విజయం, హిందీ యూట్యూబ్‌ వెర్షన్‌కు వచ్చిన స్పందన చూసి ఈ సీక్వెల్‌పై పాన్‌ ఇండియా స్థాయిలో పెద్ద ఆశలే పెట్టుకున్నారు. కానీ రిలీజ్‌ ఆలస్యం, తొలి రోజుల్లోనే వచ్చిన నెగటివ్‌ రివ్యూలు, వీకెండ్‌లో ఆశించిన పికప్‌ లేకపోవడం అన్నీ కలిసి బాక్సాఫీస్‌ దిశనే మార్చేశాయి. ముఖ్యంగా నార్త్‌ ఇండియా మార్కెట్‌లో పూర్తిగా విఫలమవడం ఇప్పుడు అసలు చర్చగా మారింది.

‘అఖండ’ మొదటి భాగం బాలకృష్ణ కెరీర్‌లో టర్నింగ్‌ పాయింట్‌గా నిలిచింది. థియేటర్లలో సూపర్‌ హిట్‌ అవడమే కాకుండా, ఓటిటి తర్వాత ఇతర భాషల ప్రేక్షకుల వరకు చేరింది. ముఖ్యంగా హిందీ యూట్యూబ్‌ వెర్షన్‌కు వచ్చిన వ్యూస్‌, కామెంట్స్‌ చూసి చిత్రబృందం ఒక కీలక నిర్ణయం తీసుకుంది. ఈసారి సినిమాను కేవలం తెలుగు మార్కెట్‌కే పరిమితం చేయకుండా, పాన్‌ ఇండియా స్థాయిలో తీసుకెళ్లాలనుకుంది. అదే సమయంలో హిందీలో సనాతన ధర్మం, ఇతిహాస రిఫరెన్స్‌లతో వచ్చిన కొన్ని సినిమాలు మంచి వసూళ్లు సాధించడం కూడా ఈ ఆలోచనకు మరింత బలం ఇచ్చింది.

ఆ నమ్మకంతోనే ‘అఖండ 2’ను నార్త్‌ మార్కెట్‌కు తగ్గట్టుగా ప్రమోట్‌ చేశారు. హిందీలో ప్రెస్‌ మీట్లు, ఇంటర్వ్యూలు, దేశభక్తి టోన్‌ను హైలైట్‌ చేసే ప్రచారం జరిగింది. కానీ ఇక్కడే అసలు సమస్య మొదలైంది. నార్త్‌ ఇండియా ప్రేక్షకులు ఇటీవలి కాలంలో ఆదరిస్తున్న సినిమాలు ఎక్కువగా స్పష్టమైన కథనం, ఎమోషనల్‌ డ్రైవ్‌, లేదా గ్రౌండెడ్‌ నేరేటివ్‌తో కూడినవిగా ఉన్నాయి. ‘అఖండ`2’ మాత్రం ఈ అన్ని అంశాలను ఒకేసారి పట్టుకోవాలన్న ప్రయత్నంలో అసలు కనెక్ట్‌ కోల్పోయింది.

నార్త్‌ మార్కెట్‌లో సినిమా ఎందుకు వర్కవుట్‌ కాలేదన్నదాన్ని లోతుగా చూస్తే, ప్రధానంగా మూడు అంశాలు స్పష్టంగా కనిపిస్తాయి. మొదటిది కంటెంట్‌. బోయపాటి శ్రీను సినిమాలు సాధారణంగా లోకల్‌ రాజకీయాలు, ఫాక్షనిజం, ప్రతీకారం వంటి అంశాల చుట్టూ తిరుగుతాయి. ఇవి తెలుగు ప్రేక్షకులకు బలంగా కనెక్ట్‌ అవుతాయి. కానీ ‘అఖండ`2’లో దేశభక్తి అనే పెద్ద కాన్వాస్‌ను ఎంచుకుని, ఇండియా-చైనా సరిహద్దు సమస్యలు, డీఆర్‌డీఓ, జాతీయ రాజకీయాలు, సనాతన ధర్మం అన్నింటినీ కలపడానికి ప్రయత్నించారు. ఈ అంశాలు నార్త్‌ ప్రేక్షకులకు కొత్తవి కావు, కానీ అవి కథలో సహజంగా మిళితం కాకపోవడం వల్ల ఆసక్తిని రేకెత్తించలేకపోయాయి.

రెండోది నేరేటివ్‌ టోన్‌. నార్త్‌ మార్కెట్‌లో పనిచేసిన ఇటీవలి సినిమాలు ప్రేక్షకులను కథలోకి నెమ్మదిగా లాగుతాయి. కానీ ‘అఖండ`2’లో మాస్‌ ఎలివేషన్స్‌, డైలాగ్‌ ఓరియెంటెడ్‌ సీన్లు ఎక్కువగా ఉండటంతో, భావోద్వేగ అనుసంధానం ఏర్పడలేదు. హీరో ఎలివేషన్‌ పనిచేసినా, కథతో ప్రేక్షకుడు ప్రయాణించే అవకాశం తగ్గిపోయింది. ఇది నార్త్‌ ఆడియెన్స్‌కు పెద్ద మైనస్‌గా మారింది. మూడోది టైమింగ్‌. అదే సమయంలో విడుదలైన ‘ధురంధర్‌’ హిందీ మార్కెట్‌ను పూర్తిగా ఆక్రమించేసింది. స్ట్రాంగ్‌ వర్డ్‌ ఆఫ్‌ మౌత్‌తో ఆ సినిమా ఊపందుకోవడంతో, ‘అఖండ`2’కి థియేటర్లలో స్పేస్‌ కూడా దొరకలేదు. ఫలితంగా హిందీ వెర్షన్‌ మొత్తం రన్‌లో కనీసం ఒక కోటి నెట్‌ కూడా రాబట్టలేకపోయింది. ఇది థియేటర్‌ ఖర్చులకు కూడా సరిపోని స్థాయి కావడంతో, నార్త్‌ బెల్ట్‌లో సినిమా పూర్తిగా ఫెయిల్యూర్‌గా నమోదైంది.

ఈ పరిస్థితుల్లో పాన్‌ ఇండియా మీద పెట్టుకున్న నమ్మకం పూర్తిగా తప్పుదారి పట్టిందన్న భావన ట్రేడ్‌లో బలంగా వినిపిస్తోంది. మొదటి భాగం ఇచ్చిన క్రేజ్‌, యూట్యూబ్‌ పాపులారిటీ, ఇటీవలి ట్రెండ్స్‌ అన్నీ కలిపి ఒక అంచనా వేశారు కానీ, అసలు కంటెంట్‌ నార్త్‌ ప్రేక్షకుల నరాన్ని పట్టుకోలేకపోయింది. అయితే తెలుగు రాష్ట్రాల్లో పరిస్థితి కొంత భిన్నంగా ఉంది. మొదట్లో మిశ్రమ స్పందన వచ్చినా, బాలకృష్ణ ఫ్యాన్‌ బేస్‌ కారణంగా కలెక్షన్లు నిలకడగా కొనసాగాయి. వర్డ్‌ ఆఫ్‌ మౌత్‌ కొంతవరకు పని చేయడంతో సినిమా గౌరవప్రదమైన గ్రాస్‌ నంబర్ల వైపు సాగుతోంది. ట్రేడ్‌ అంచనాల ప్రకారం వంద కోట్ల గ్రాస్‌ మార్క్‌ను దాటే అవకాశమూ కనిపిస్తోంది. అయినప్పటికీ, మొత్తం బిజినెస్‌ లెక్కలు చూస్తే సినిమా లాభాల్లోకి వెళ్లే స్థితిలో లేదు. మొత్తానికి, ‘అఖండ`2’ ఒక స్పష్టమైన పాఠాన్ని నేర్పింది. సనాతన ధర్మం, ఇతిహాస రిఫరెన్స్‌లు ఉన్నాయంటే హిందీ మార్కెట్‌ ఆటోమేటిక్‌గా స్పందిస్తుందన్న భావన సరైనది కాదని ఈ సినిమా నిరూపించింది. పాన్‌ ఇండియా అనేది కేవలం థీమ్‌తో కాదు, కథనం, భావోద్వేగం, టైమింగ్‌ అన్నీ కలిసినప్పుడు మాత్రమే సాధ్యమవుతుందని ‘అఖండ`2’ ప్రయాణం స్పష్టంగా చూపించింది.

- జోశ్యుల సూర్యప్రకాశ్‌