ఓజీ..ఎలివేషన్స్‌ పీక్‌.. ఎగ్జిక్యూషన్‌ వీక్‌

‘అత్తారింటికి దారేది’ తర్వాత పవర్‌ స్టార్‌ పవన్‌ కళ్యాణ్‌ తమ ఆకాంక్షలకు తగిన సినిమా చేయలేదనే అసంతృప్తితో ఉన్నారు అభిమానులు. రెండు నెలల కిందట వచ్చిన ‘హరిహర వీరమల్లు’ కూడా వారిని తీవ్ర నిరాశకు గురి చేసింది. కానీ తమ ఆకలి తీర్చే సినిమా అవుతుందని ‘దే కాల్‌ హిమ్‌ ఓజీ’ మీద చాలా ఆశలే పెట్టుకున్నారు ఫ్యాన్స్‌. వారి నిరీక్షణకు తెరదించుతూ ఎట్టకేలకు థియేటర్లలోకి దిగాడు ఓజాస్‌ గంభీర. మరి తన అభిమాన కథానాయకుడిని దర్శకుడు సుజీత్‌ ఎలా చూపించాడు.. అతను తన లాంటి వీరాభిమానుల కడుపు నింపాడా? ఆకాశాన్నంటే అంచనాలను ‘ఓజీ’ అందుకుందా? తెలుసుకుందాం పదండి.

కథ:

ఓజాస్‌ గంభీర అలియాస్‌ ఓజీ (పవన్‌ కళ్యాణ్‌) ఒక అనాథ. జపాన్లో సమురాయిల సమూహంలో పెరిగి పెద్దవాడవుతూ మార్షల్‌ ఆర్ట్స్‌ నేర్చుకున్న అతను.. అక్కడి నుంచి అనుకోని పరిస్థితుల్లో శరణార్థిగా ముంబయికి బయల్దేరతాడు. ఆ ప్రయాణంలో తన మనుషులను.. తన సంపదను కాపాడిన ఓజాస్‌ ను సొంత కొడుకులా చూసుకుంటాడు సత్య దాదా (ప్రకాష్‌ రాజ్‌). ముంబయిలో పోర్టు పెట్టి వేల మందికి ఉపాధి కల్పించిన సత్య దాదాను ఓజాస్‌ జాగ్రత్తగా కాపాడు కుంటూ వస్తుంటాడు. అలాంటి వాడు కొన్ని కారణాలతో సత్య దాదాకు దూరమై.. ముంబయిని వదిలి వెళ్లిపోతాడు. పదేళ్లకు పైగా ఆ నగరం వైపు చూడడు. కానీ ఓమి బవు (ఇమ్రాన్‌ హష్మి) అనే మాఫియా డాన్‌ కారణంగా సత్య దాదా కుటుంబంలో అనుకోని పరిణామాలు చోటు చేసుకుని.. పోర్టు ప్రమాదంలో పడ్డ స్థితిలో ఓజీ తిరిగి రావాల్సిన పరిస్థితి తలెత్తుతుంది. ఇంతకీ ఓమి ఎవరు.. అతడి లక్ష్యమేంటి.. తన వల్ల సత్య దాదాకు వచ్చిన కష్టమేంటి.. ముంబయికి తిరిగొచ్చిన ఓజీ.. ఓమిని ఢీకొని గెలిచాడా.. అన్ని సమస్యలనూ పరిష్కరించాడా.. అన్నది మిగతా కథ.

కథనం-విశ్లేషణ:

ప్రతి అభిమానికీ తన హీరో తెరపై ఎలా కనిపిస్తే బాగుంటుంది అనే విషయంలో ఒక అంచనా ఉంటుంది. మరి అలాంటి అభిమానే దర్శకుడిగా మారి.. తన అభిమాన కథానాయకుడితో సినిమా తీసే అవకాశం అందుకుంటే? తన ఫేవరెట్‌ హీరోను ఎంత అందంగా చూపించాలి.. ఆ హీరో నుంచి బెస్ట్‌ లుక్‌ ఎలా తీసుకురావాలి.. ఎంత బాగా ఎలివేషన్‌ ఇవ్వాలి.. తన లాంటి అభిమానులకు ఎలా గూస్‌ బంప్స్‌ ఇవ్వాలి.. ఈ విషయాలపై ఎక్కువ ఫోకస్‌ చేయడం సహజం. అందులో తప్పు లేదు కూడా. వీటితో పాటు కథ మీద దృష్టిపెడితే.. కథనంలోనే బలం ఉంటే.. అద్బుతాలు ఆవిష్కృతమవుతాయి. ‘ఓజీ’ ప్రోమోలు చూస్తే పైన చెప్పుకున్నట్లే ఒక సగటు అభిమాని కోణంలో పవన్‌ నుంచి ది బెస్ట్‌ రాబట్టుకోవడానికి సుజీత్‌ ఏం చేయాలో అంతా చేసినట్లే అనిపించింది. ఐతే అభిమానులను దాటి సగటు ప్రేక్షకులను మెప్పించడానికి ఏం చేశారన్నదే అంతిమంగా సినిమా ఫలితాన్ని నిర్దేశిస్తుంది. ఈ విషయంలో సుజీత్‌ తడబడ్డాడు. అతనేమీ కసరత్తు చేయలేదని అనలేం.. తన కష్టాన్ని తక్కువ చేయలేం. కానీ ‘గ్యాంగ్‌ స్టర్‌ డ్రామా’ అనే ఊబిలో పడిపోవడంతో కథ పరంగా కొత్తగా అతను చేయడానికి పెద్దగా ఏమీ లేకపోయింది. ఇప్పటికే చాలాసార్లు చూసిన కథలనే అటు ఇటు తిప్పి చూస్తున్నట్లు అనిపిస్తుందే తప్ప.. కొత్త ఫీలింగ్‌ ఏమీ కలగదు. కథ సంగతి పక్కన పెట్టేస్తే సినిమా అంతా పవర్‌ స్టార్‌ ను హైలైట్‌ చేస్తూ ఒకటే ఎలివేషన్లు.. యాక్సన్‌ సీక్వెన్సులు.. అవి అభిమానులకు కావాల్సినంత కిక్కు అయితే ఇస్తాయి. కానీ తెర వెనుక తమన్‌ ఇచ్చిన సపోర్టుతో ఫ్యాన్‌ మూమెంట్స్‌ వరకు మంచి మార్కులు కొట్టేసిన సుజీత్‌.. ‘ఓజీ’ని అందరూ మెచ్చే చిత్రంలా తీర్చిదిద్దడంలో మాత్రం తడబడ్డాడు.

గ్యాంగ్‌ స్టర్‌ డ్రామాలు అనగానే ఎంత ట్రెండీ డైరెక్టర్‌ అయినా.. ఒక మూసలోకి వెళ్లే సినిమాలు చేయాల్సి ఉంటుందనడానికి ‘ఓజీ’ మరో ఉదాహరణగా నిలుస్తుంది. జపాన్‌ నేపథ్యం తీసుకుని సమురాయిల శిక్షణలో రాటుదేలిన కుర్రాడిగా హీరో పాత్రను కాస్త భిన్నమైన నేపథ్యంతో మొదలుపెట్టి ఆశలు రేకెత్తించినా.. ఆ తర్వాత వ్యవహారమంతా పాతగానే అనిపిస్తుంది. అనామకుడిలా ఒక సామ్రాజ్యంలోకి అడుగుపెట్టే హీరో.. అందరినీ గడగడలాడిరచే స్థాయికి ఎదగడం.. అనుకోని పరిస్థితుల్లో ఆ సామ్రాజ్యాన్ని విడిచిపెట్టి వెళ్లి.. కొంత కాలానికి తిరిగి రావడం.. మళ్లీ తన ఆధిపత్యాన్ని చాటడం.. ఇలా అలవాటైన ఫార్మాట్లో సాగిపోతుంది ‘ఓజాస్‌ గంభీర’. పవన్‌ కళ్యాణ్‌ ఫిల్మోగ్రఫీలోనే బాలు.. పంజా లాంటి చిత్రాలను గుర్తు చేసే ‘ఓజీ’కి మలయాళ లూసిఫర్‌ టచ్‌ కూడా ఇచ్చాడు సుజీత్‌. దీని వల్ల ఏదో ఒక కొత్త సినిమా చూస్తున్న ఫీలింగ్‌ కలగదు. ఐతే కథ సంగతి ఎలా ఉన్నా.. సూపర్‌ స్టైలిష్‌ గా కనిపించే పవన్‌ కళ్యాణ్‌ కు బలమైన ఎలివేషన్‌ సీన్లు పడడం.. యాక్షన్‌ ఎపిసోడ్లు పేలిపోవడంతో ‘ఓజీ’ పవన్‌ అభిమానులనే కాక మాస్‌ ప్రేక్షకులనూ ఎంగేజ్‌ చేస్తుంది. విపరీతమైన బిల్డప్‌ తర్వాత వచ్చే ఓజాస్‌ పరిచయ సన్నివేశం బాగానే పేలింది. దాన్ని మించి ఇంటర్వెల్‌ ఎపిసోడ్‌ గూస్‌ బంప్స్‌ ఇస్తుంది. సినిమాలో మేజర్‌ హైలైట్‌ ఇంటర్వెల్‌ ఎపిసోడే అనడంలో సందేహం లేదు. ఇలాంటి ఎలివేషన్‌ సీన్లు కొత్తేమీ కాదు కానీ.. అదేమీ చూడని సన్నివేశం కాదు.. అయినా సరే మాస్‌ ప్రేక్షకులకు అది పూనకాలు తెప్పిస్తుంది. దర్శకుడు.. కెమెరామన్‌.. మ్యూజిక్‌ డైరెక్టర్‌.. ముగ్గురూ కలిసి తమ బెస్ట్‌ ఇచ్చారు ఆ ఎపిసోడ్లో.

బ్యాంగ్‌ బ్యాంగ్‌ ఇంటర్వెల్‌ ఎపిసోడ్‌ తర్వాత.. ద్వితీయార్దంలో ఫాలో అప్‌ కూడా బాగానే ఉంది. ‘ఓజీ’ ఫస్ట్‌ టీజర్‌ గ్లింప్స్‌ లో చూపించిన పోలీస్‌ స్టేసన్‌ ఎపిసోడ్‌ సినిమాలో మరో హైలైట్‌. ఇక్కడ దర్శకుడిగా సుజీత్‌ పనితనం కనిపిస్తుంది. ఈ సన్నివేశాన్ని కన్సీవ్‌ చేసిన విధానం ఆకట్టుకుంటుంది. ఐతే ఇదే టెంపోను తర్వాత కూడా కొనసాగించి ఉంటే ‘ఓజీ’ స్థాయి వేరుగా ఉండేది. ఓజాస్‌ ముంబయికి తిరిగి వచ్చాక తర్వాత ఏం చేస్తాడనే విషయంలో పెద్దగా సర్ప్రైజులేమీ లేవు. హీరో-విలన్‌ మధ్య ఎత్తులు పై ఎత్తులు అంత ఆసక్తికరంగా అనిపించవు. ఎంతసేపూ హీరోను ఎలివేట్‌ చేయడమే లక్ష్యంగా సన్నివేశాలు సాగుతుంటే.. సినిమా ఏకపక్షంగా మారిపోయి ఆసక్తి సన్నగిల్లిపోతుంది. హీరో ముందు విలన్‌ పాత్ర అంత బలంగా కనిపించకపోవడం మైనస్‌. కథలో ఏదైనా గొప్ప ట్విస్టు ఉంటుందేమో అని ఆశిస్తే.. నిరాశ తప్పదు. కొన్ని మలుపులు ఉన్నప్పటికీ అవి అంతగా పండలేదు. ద్వితీయార్ధాన్ని నిలబెట్టేంత డ్రామా కథలో లేకపోయింది. ఆర్డీఎక్స్‌ కంటైనర్‌ వ్యవహారం ఒక దశ దాటాక చికాకు పెడుతుంది. ఇంత పెద్ద యాక్షన్‌ సినిమాను నడిపించేంత వెయిట్‌ ఆ కాన్సెప్టులో లేకపోయింది. సినిమాలో ప్రథమార్థంలో ఉన్న వేగం ద్వితీయార్ధంలో కనిపించదు. క్లైమాక్స్‌ యాక్షన్‌ సీక్వెన్సులో టేకింగ్‌ బాగున్నప్పటికీ.. ఆ ఎపిసోడ్‌ పేలిపోయే రేంజిలో అయితే లేదు. ఓవరాల్‌ గా చెప్పాలంటే.. పవన్‌ అభిమానులకు అయితే ‘ఓజీ’ కనువిందుగా అనిపిస్తుంది. ఎలివేషన్లకు.. యాక్షన్‌ సీక్వెన్సుల్లో మెరుపులకు ఇందులో లోటు లేదు. కానీ అంతకుమించి విశేషంగా ఏముందని చూసే సామాన్య ప్రేక్షకులకు మాత్రం ఒకింత నిరాశ తప్పదు.

నటీనటులు- పెర్ఫార్మెన్స్‌ :

సినిమాల్లోకి రీఎంట్రీ ఇచ్చాక పవన్‌ అత్యంత స్టైలిష్‌ గా.. బెస్ట్‌ లుక్స్‌ లో కనిపించిన సినిమా.. ఓజీ. మొత్తంగా కెరీర్లోనే పవన్‌ ది బెస్ట్‌ గా కనిపించిన చిత్రాల్లో ఇదొకటిగా చెప్పొచ్చు. ఓజాస్‌ గంభీర పాత్రలో ఆయన స్క్రీన్‌ ప్రెజెన్స్‌ చాలా బాగుంది. ‘హరిహర వీరమల్లు’లో మాదిరి దాగుడుమూతలు ఆడినట్లు కాకుండా ఇందులో పవన్‌ మీద యాక్షన్‌ ఘట్టాలను కొంచెం నమ్మశక్యంగా అనిపించేలా తీశారు. పవర్‌ కూడా బాగానే ఎఫర్ట్‌ పెట్టాడు. పోలీస్‌ స్టేషన్‌ సీన్‌ సహా కొన్ని ఎపిసోడ్లలో పవన్‌ పెర్ఫామెన్స్‌ ఆకట్టుకుంటుంది. తన అభిమానులకు ఏం కావాలో అది పవన్‌ ఈ సినిమాతో ఇచ్చేశాడు. ప్రియాంక అరుల్‌ మోహన్‌ బాగా చేసింది. పవన్‌ తో ఆమె జోడీ ఏమాత్రం కుదురుతుందో అని సందేహించిన వాళ్లకు సినిమా సమాధానం చెబుతుంది. తక్కువ నిడివి ఉన్న పాత్ర అయినా ప్రియాంక తన ప్రాధాన్యతను చాటుకుంది. విలన్‌ పాత్రలో ఇమ్రాన్‌ హష్మి సూపర్‌ స్టైలిష్‌ గా కనిపించాడు. కానీ ఆ పాత్రకు ఆరంభంలో ఇచ్చిన బిల్డప్‌ కు తగ్గట్లు పవర్‌ ఫుల్‌ గా ఆ పాత్ర అనిపించదు. కానీ ప్రతి సన్నివేశంలో ఇమ్రాన్‌ తన ప్రత్యేకతను చాటుకునే ప్రయత్నం చేశాడు. మరో విలన్‌ సుదేవ్‌ నాయర్‌ ఆకట్టుకున్నాడు. సత్య దాదాగా కీలక పాత్రలో ప్రకాష్‌ రాజ్‌ రాణించాడు. అర్జున్‌ దాస్‌ పాత్ర నిరాశపరుస్తుంది. సినిమాలో దాని ఇంపాక్ట్‌ పెద్దగా కనిపించదు. గీత పాత్రలో శ్రియా రెడ్డి బాగా చేసింది. కనిపించిన ప్రతి సన్నివేశంలోనూ తన ఉనికిని చాటుకుంది. తేజ్‌ సప్రు.. ఉపేంద్ర లిమాయే.. మిగతా నటీనటులంతా మామూలే.

సాంకేతికవర్గం - పనితీరు :

‘ఓజీ’ సినిమాకు తెర ముందు పవన్‌ హీరో అయితే.. తెర వెనుక కథానాయకుడు తమనే. జైలర్‌.. లియో లాంటి సినిమాలకు తన సమాధానం ‘ఓజీ’ అంటూ తమన్‌ అంత ధీమాగా ఎందుకు చెప్పాడో.. ‘ఓజీ’ థియేటర్లో అడుగు పెట్టిన తొలి నిమిషం నుంచే అర్థమవుతుంది. బీజీఎంతో అతను తాండవం ఆడేశాడు. సూపర్‌ స్టైలిష్‌ గా సాగుతూ.. ప్రేక్షకులకు గూస్‌ బంప్స్‌ ఇస్తుంది స్కోర్‌. పాటలు.. బీజీఎం అన్ని మిక్స్‌ అయిపోయి ఒక టెంపోలో సాగుతాయి. ఎలివేషన్‌ సీన్లలో తమన్‌ బీజీఎం మోతెక్కిపోయింది. రవి.కె.చంద్రన్‌ ఛాయాగ్రహణం కూడా సూపర్బ్‌. విజువల్స్‌ కంటికి ఇంపుగా అనిపిస్తాయి. సుజీత్‌ అభిరుచికి తగ్గట్లుగా స్లైలిష్‌ విజువల్స్‌ తో సినిమాకు మంచి లుక్‌ తీసుకొచ్చారు రవిచంద్రన్‌. నిర్మాణ విలువలకు ఢోకా లేదు. చాలా రిచ్‌ గా తీశారు. ఇక రైటర్‌ కమ్‌ డైరెక్టర్‌ సుజీత్‌.. తన అభిమాన కథానాయకుడిని ఎంత స్టైలిష గా చూపించాలి.. ఎలాంటి ఎలివేషన్లు ఇవ్వాలి అన్న దాని మీదే ఎక్కువ ఫోకస్‌ పెట్టినట్లు అనిపిస్తుంది. ఈ విషయంలో అతను విజయవంతం అయ్యాడు. తన టేకింగ్‌ చాలా బాగుంది. యాక్షన్‌ ఎపిసోడ్లు.. ఎలివేషన్‌ సీన్లు బాగా తీర్చిదిద్దుకున్నాడు. కానీ తన కథలో కొత్తదనం చూపించలేకపోయాడు. కథనం కూడా కొంచెం ఎగుడుదిగుడుగా సాగుతుంది. డ్రామా అనుకున్నంతగా పండలేదు. ‘సాహో’ ఫలితం ఎలా ఉన్నా అందులో చాలా ట్విస్టులు.. సర్ప్రైజులుంటాయి. ఈ కోణంలో అతను నిరాశపరిచాడు.

- తుపాకి.కామ్‌ సౌజన్యంతో..